Jetzt schdohts ond niemert muess me im Räge i de Liebige z'Brettnou uf de Bus warte. Göhnd Si mol go luege, es esch super usecho!
Die bede Lehrling händ müesse e suuberi Massufnahm vom beschdehende Bushüsli mache. Anhand vo dere Massufnahm händ die Bede denn e detaillierte Usfüehrigsplan müesse zeichne. Das esch e üsserschd enteressanti ond lehrriichi Ufgabe för die bede Stefte, wo z'Brettnou ou ufgwachse send, gxi. Nochdäm eschs as Produziere gange. S'Hüsli esch i de Zimmerei abbunde ond ou scho mol fertig ufgstellt worde. Scho glii esch de drufabe de Ufrechttermin feschd gschdande. Se händ das Hüsli inere Rägepouse id Liebige transportiert. Passgnau händsis ufs beschtehende Fondamänt gschdöut ond d'Fröid bi dene Bedne esch nadürli gross gxi, wo aues passt het. Am Schloss händ si no s'Vordach, d'Ziegu ond d'Ort- ond Schdernläde mondiert.
S'Fazit vo de bede Lernende isch eistemmig usecho: D'Arbet seg guet abgloufe ond se heige vöu chönne drus lehre ond metnäh. Ou dass si bereits d'Planig ond d'Organisazion heige chönne öbernäh, was süsch de Vorgsetzt jo machi, seg enteressant ond lehrriich gxi.
Öis erföuts met Schdouz, met wie vöu Ongaschemo ond persönlechem Iisatz öisi zwe Stefte sech iibrocht ond das Vorhabe omgsetzt händ. Vele Dank ou ad Gmeind Brettnou för dä Uftrag onds Vertroue i öise Nochwuchs ond e Dank ad AGZ Ziegeleie AG z'Gettnou förd Onderschdötzig vom Projekt.
Schapoo Nick Kunz ond Patrick Frey - ehr händ das wörkli sehr guet gmacht!
Seit 1890
